လူတိုင်း လူတိုင်း လှပသော နှလုံးသားများ ရှိကြပါစေ

My photo
ကမ္ဘာပေါ်မှာရှိသော လူတိုင်းလူတိုင်း မွန်မြတ်သော စိတ်ထားများ ထားနိုင်ကြပါစေ ဖြူစင်သော နှလုံးသားများ ရှိကြပါစေ

Monday, July 31, 2017

နေ့ရက်ဆိုးများ

ညနက်တွေထဲ
ဝေခွဲမရ
'' မမ '' မျက်နှာ
ရင်မှာစွဲထင်
ချစ်ကြင်ပေမယ့်
အိုဘယ့်ကြမ္မာ
ဝင်လာမွှေနှောက်
သောကရောက်သည်
လွမ်းရန်အသဲတစ်စုံနှင့် ။

နေ့ရက်တွေထဲ
ရွှေသဲလွှာမှာ
မဟာမြေကြီး
တုန်ဟီးသိမ့်လှုပ်
တဖြုတ်ဖြုတ်ကြွေ
မျက်ရည်သွန်းဖြိုး
စွေမိုးပမာ
စီးကာကျသည်
မို့မို့မျက်ဝန်းတစ်စုံနှင့် ။

နေ့ ည မရွေး
လွမ်းရေးခက်ခက်
တစ်သက်မမေ့
ဆွေးမြေ့ကျွမ်းလောင်
အမှောင်လမ်းထဲ
ယိုင်လဲခြေလှမ်း
အနမ်းကွယ်ပျောက်
လျှောက်မြဲလျှောက်မည်
လောက ကျိန်စာတစ်ခုနှင့် ။

          လူကလေး
          1.8.2017

Sunday, July 30, 2017

နမ်းရှိုက်ခွင့်မရှိခဲ့သော ပန်းတစ်ပွင့်

ရစ်သမ် မညီတဲ့ တေးသွား
စုတ်ချက် မပီတဲ့ ပန်းချီကားနဲ့
နှလုံးသားကို ပြည်ဖုံးကားချလိုက်ပါပြီ  မ ရယ် ။

ထာဝရထက် နှစ်ဆ ပိုချစ်ပေမယ့်
ဖျားနာနေတဲ့ နှလုံးသားက
အလွမ်းတွေကိုစားသုံး
နာရီတွေနဲ့ နပမ်းလုံးနေရတယ်  မ ရယ် ။

ညတွေကလဲ မှောင်မိုက်လွန်းလှပါတယ်
ကြယ်ကြွေလို့လဲ မဟုတ်ဘူး
လမင်းကြီး မြေခ လို့လဲမဟုတ်ပါဘူး
မ မရှိလို့ ပါ ။

ညနက်တွေဆို အိပ်မက်ဆိုးတွေလဲ မက်တယ်
စေတန်နတ်ဆိုး နှောက်ယှက်လို့ မဟုတ်ပါဘူး
မ ကို တမ်းတခွင့် မရတော့လို့ပါ ။

တသွင်သွင်စီးဆင်းနေတဲ့ နှလုံးသွေးတွေထဲမှာ
လွမ်းဆွေးခြင်းတွေ မျောပါနေတယ်   မ  ။
နှလုံးခုန်နှုန်းတိုင်းမှာ မ ဆိုတဲ့
နာမည်လေးကို ဆိုညည်းနေမိတယ် မ ။

နောက်ဆိုရင် အိပ်စက်ခြင်းနဲ့ ဓါတ်မတည့်လို့
မျက်ရည်တွေက်ိုပွေ့ပိုက်ရင်း
မှောင်မိုက်တဲ့ အနာဂါတ်လမ်းမှာ
စမ်းတဝါးဝါးနဲ့လမ်းမှားနေအုံးမှာပဲ '' မ ''

                     လူကလေး
                   31.7.2017

Saturday, July 22, 2017

မ မသိခဲ့ဘူး

'' မ  ''  မသိခဲ့ဘူးးးး
အေးမြတဲ့  ''မ'' အပြုံးတွေအောက်မှာ
နှလုံးသားတစ်ခုလုံး လောင်မြိုက် သွားခဲ့တာ ၊
'' မ ''  မသိခဲ့ဘူးးးး
ချိုမြိန်တဲ့ '' မ '' စကားသံတွေအောက်မှာ
နှလုံးသား တစ်ခုလုံး ပျော်ဝင်နေခဲ့တာ ၊
'' မ '' မသိခဲ့ဘူးးးး
မှောင်မိုက်တဲ့ ညနက် တွေတိုင်းမှာ
'' မ '' ကိုတမ်းတနေမိတာ ၊
'' မ '' မသိခဲ့ဘူးးးး
သေဆုံးသွားခဲ့ရင်တောင်  '' မ '' အနားမှာ
လိပ်ပြာငယ်လေးအဖြစ် ဝဲပျံနေချင်ခဲ့တာ ၊
'' မ '' မသိခဲ့ဘူးးးး
'' မ '' ရဲ့အသဲနှလုံးကို ကျွန်တော်တစ်ယောက်ပဲ
ပိုင်ဆိုင်ချင်ခဲ့တာ ၊
'' မ '' မသိခဲ့ဘူးးးး
စက္ကန့်တိုင်း '' မ '' ကို လွမ်းနေခဲ့တာ ၊
'' မ ''  မသိခဲ့ဘူးးးး
ကဗျာလေးတွေက '' မ '' ကိုကိုယ်စားပြုတယ်ဆိုတာ ၊

''  မ '' မသိခဲ့ဘူး………
''  မ '' မသိခဲ့ဘူး………
''  မ '' မသိခဲ့ဘူး………

ဘယ်တော့မှ '' မ '' သိလာမှာမဟုတ်ဘူး ~~~

          လူကလေး
          23.7.2017

မမ သို့

လွမ်းတယ် ……………မ
'' မ '' နုတ်ဖျားက ချိမြိန်တဲ့ သံစဉ်လေးတွေ ။
လွမ်းတယ် …………မ
ဖြူစင်အေးမြတဲ့ '' မ '' ရဲ့အပြုံးလေးတွေ ။
လွမ်းတယ် ……………မ
စူးရှတဲ့ '' မ '' ရဲ့မျက်ဝန်းလေးတွေ ။
လွမ်းတယ် …………… မ
နက်မှောင်ပျော့ပြောင်းတဲ့ '' မ '' ရဲ့ဆံနွယ်လေးတွေ ။
လွမ်းတယ် ……………မ
လွမ်းတယ် ……………မ
လွမ်းတယ် ……………မ
လွမ်းတယ် ……………မ
လွမ်းတယ် ……………မ
လွမ်းတယ် ……………မ
လွမ်းတယ် ……………မ
လွမ်းတယ် ……………မ
လွမ်းတယ် ……………မ
လွမ်းတယ် ……………မ
လွမ်းတယ် ……………မ
လွမ်းတယ် ……………မ
လွမ်းတယ် ……………မ
လွမ်းတယ် ……………မ
လွမ်းတယ် ……………မ
လွမ်းတယ် ……………မ
လွမ်းတယ် ……………မ

          လူကလေး
          22.7.2017

Tuesday, July 18, 2017

အာဇာနည် နေ့

အာဇာနည် အလေးပြု

ငါတို့အတွက်၊ ကိုယ့်အသက်ကို၊
မကွက်မညှာ၊ စွန့်ကြရှာသည်၊
ဇာနည်နွယ်ဘွား၊ သူတို့အားလျှင်၊
ညွှတ်တွားသမှု၊ အလေးပြု၍၊
သာဓုနုမော်၊ ကောင်းချီးခေါ်သည်၊
ခြောက်ဖော်နတ်က ကြားစေသောဝ်။

(မင်းသုဝဏ်)
(၄၊ ၁၊ ၁၉၅၃)
(အင်းယားကန်သို့ အိုကုတို့ ကဗျာစာအုပ်၊ စာမျက်နှာ ၁၄၃-မှ ....)

အာဇာနည်နေ့

အာဇာနည်ဗိမာန်

သြော် … အဆောင်ဆောင် နန်းတွေ ကြငှန်းတွေနှင့်နှော
အခေါင်မမြန်းခင်က အောင်စာတမ်း ချို့စေဘို့ အောင်ပန်းညှို့ရရှာတဲ့
တောင်တမန်း တို့ဗမာမှာ အဟောင်းသံသရာ အငုတ်တွေနှင့်
အောင်ဆန်းတို့ မသာမယာဟာ ၎င်းကံကြမ္မာ အလုပ်ပေထင့်
သောင်းမြန် မရဏာ စမုတ်မှာတော့ ချုပ်သနဲ့ ယင်းအလိုတွင်
ဒေါင်းလံပုဝါအုပ်ပါလို့ ကျုပ်ဖြင့် သင်္ဂြိုဟ်ချင်။


သြော် … တပည့်အရင်းတွေမို့ ကဝိမတင်းနိုင်ဘုကွဲ့၊
သတိကင်းကာ မျက်ရည်ကျကျပြီး၊
ခက်ကပြီ လက်ဆည်မရနိုင်ဘု၊
သောက ဘလောင်ဆူတော့ တောင်ဇမ္ဗူ ပုဂံခေတ်ဆီက၊
ယခေါင်မူ ယမန်သနစ်တွေပေါ့၊
ရန်အဖြစ်မကွဲ့ မနှေးသနော် တသောင်း ဒီဇမ္ဗူရမ်းနေကြ၊
ကျန်ရစ်တဲ့ မြေးတော် အလောင်းစည်သူရဲ့ နန်းကိုဖြင့်၊
လူကြမ်း ဓပြတွေ ကြမ်းလာရမ်းလာတဲ့ အရေးတွင်မှ၊
ဘေးအပေါင်းကြီးစွာ ဝေဒနာ အစုံနဲ့၊
သွေးချောင်းစီးကာ သေရှာပုံရဲ့ပြင်၊
ရွှေမြန်မာဘုံမှာ အမင်းမင်း သမတတွေနဲ့၊
သတင်းလှတဲ့ အင်းဝရာဇာအမွန် သာလွန်မင်းကိုမှ၊
သားရင်း ရှင်တရုပ်ကယ်က၊
ရှင်ဘုရင်လုပ်မယ် အကျယ်ဇယားတွင်ဖြင့်၊
ဒဝယ်သားတွေ ဗိုလ်ဝင်ခံလို့မို့၊
ဟိုအရင်ယမန် နန်းတော်စီးစဉ်က၊
အပျက်ကြီးပျက်ကာ အသက်ခန္ဓာတွေဆုံးပုံနဲ့၊
တထုံး နောက်တနဲမှာတော့၊
မင်းရဲရန္တမိတ်ခမြာမှာ ညီသနင်းပေပေါ့၊
ပြည်မင်းဂုဏ်ခံလို့၊
မှုန်မှုန်ဆန်ဆန် ပုန်ကန်တဲ့ အတိုင်းရဲ့ပြင်၊
တလိုင်းနယ် ရွေပြည်တခွင်မတော့၊
ဓမ္မစေတီဘုရင် လက်ထက်တုန်းဆီက၊
လက်ရုံးရည် တသိန်လျှမ်းပေတဲ့၊
သမိန်ဘရမ်းဆိုသူ စစ်ဗိုလ်ချုပ်ကိုဖြင့်၊
မဟုတ်တရုတ် အကောင် တေလေတစ္ဆေကိုက်တာနဲ့၊
သြော်…..ဖွေဖွေရှာရှာ မကျေစရာပေပေါ့နှော၊
မရေမရာ သေရွာဆိုက်သလိုပါ့၊
အခိုက်အခါတူလို့မို့၊
ဆရာတမူ မကြာမကြာ လွမ်းရပါတဲ့၊
ဘမရာအဆူဆူ ကြာကြငှန်းတွေနှင့်၊
မြန်မာဇမ္ဗူ အညာမန်းတွင်ဖြင့်၊
ငါတလူ ငါသရမ်းရော့မဟဲ့လို့
သာခန်း ပလ္လင်ညွှန်းပြီး၊
မြင်ကွန်းပိုင် သူပုန်ထစဉ်က၊
ကြုံရသူ မသာတော်နှင့်၊
ပမာသော် တူတယ်လို့နှိုင်းမိတယ်၊
ရိုင်းသနဲ့ အတိတ်ယခင်လိုနော်ကွယ်၊
စကိုင်းတပဲ့ ဂိုဏ်းအဖွဲ့တွေနဲ့၊
မှိုင်းရဲ့စိတ်ထင်။

မင်းစိတ် မင်းမာန် အကြံအဖန်တင်းလိုက်ပုံက၊
အင်္ဂလိပ် ယင်းဂျပန် နှစ်တန်ရှင်းပါလို့၊
ရန်ခပင်းကိုတဲ့ မောင်းကာနှင်၊
ဒေါင်းမြန်မာတခွင်မှာဖြင့် ယခင်သဘော၊
တကောင်းရာဇဝင်ကိုတဲ့ ဆက်ချင်သကော။

နန်းမြို့တည်ရန်၊
မှန်းလို့ရည်ကာသန်တဲ့ ညီလာခံ ဗိုလ်ရှုပွဲတွင်မှ၊
ထိုထိုလူခပဲကို မကြည်ညိုတဲ့၊
ဝသီအလို တဖြေးဖြေးရူးမဟဲ့လို့၊
တနွေးနွေး မူးမူးပြီး ခွေးဘီလူးလို အကောင်မိုက်တွေက၊
သြော် ... အမှောင်စရိုက်ကယ်နှင့်၊
ပြောင်ပြောင်ဘဲ မိုက်မပေါ့လို့၊
ပြောင်ကိုက်သဟာမှာ ယာယီယတြာအချိန်နဲ့ ဇာတာမှိန်လို့မို့၊
ဂဏာမငြိမ် တာဝတိန်ယွန်းကြပေါ့၊
ဖြေမကြည် နေရီတော့လွမ်းစေဘို့၊
မြန်မာ့ပြည်ပေါ်ကို ဓမ္မစည်တော်ရွမ်းချိန်မို့၊
အစွမ်းကုန် သည်တခါဖြင့်၊
ပြည်ရွာ ညီညာဘို့အလုပ်ပေပေါ့၊
သုဿန် တံခွန်စောင်းရရှာတဲ့၊
ရုပ်အကျန် ခုနစ်လောင်းရယ်နှင့်၊
အလွန်ကောင်းစွာ ကမ္ဘာတည်မည့်၊
အာဇာနည်ဗိမာန် ပုထိုးကိုဖြင့်၊
ပါရမီ အဓိဋ္ဌာန်တမျိုးရယ်နှင့်၊
ရှိခိုးကာ ဆရာကန်တော့ချင်ရဲ့၊
မြန်မာမတော့ ပူစရာဘို့၊
တဗျူဟာ အောင်ခမန်းတွင်မှ၊
လူမသမာ အမှောင်သန်းချိန်မို့၊
သောင်ကမ်းမို့မို့ဆီက၊
ဖောင်နန်းကူးတို့နှင့် အကြေဒဂုန်တည်းဟူသော ရေစုန်မျောလေရဲ့၊
သြော် … တောင်နန်း မြောက်နန်း အဆောင်ဆောင်ကြငှန်းနဲ့၊
အခေါင်မမြန်းရခင်က အောင်ပန်းညှို့ ရရှာတဲ့၊
အောင်ဆန်းတို့ သေပုံနှမြော။ ။

‎(သခင် ကိုယ်တော်မှိုင်း)‎

Monday, July 17, 2017


အဲ့ဒီည
တိမ်တွေငိုတဲ့ည
ကြယ်တွေကြွေတဲ့ည
ငါ့အတွက်ကမ္ဘာပျက်တဲ့ည ။


အဲ့ဒီည
အသဲကွဲတဲ့ည
အချစ်တွေသေဆုံးတဲ့ည
အနာဂါတ်တွေပျောက်ဆုံးသွားတဲ့ ည ။


အဲဒီည
မလှပတဲ့ည
ကာရန်ပျောက်တဲ့ည
မှောင်မိုက်ခြင်းကြီးစိုးတဲ့ည ။


အဲ့ဒီည
ဝေဒနာဆိုးတဲ့ည
အသည်းလောင်မြိုက်တဲ့ည
ငရဲကြီးရှစ်ထပ်ကိုခါးစောင်းတင်တဲ့ည ။

          လူကလေး
          17.7.2017

ဒသနလေးများ

ဘ၀ဆိုတာ တံခါးတစ်ချပ်ဖြစ်တယ်။
တံခါးရဲ့ သစ်သားဘောင်ပေါ်မှာ ထွင်းထုထားတဲ့
ကနုတ်ပန်းအပြောက်အမွှန်းတွေ .... ပန်းပုရုပ်လုံးတွေကို
ငေးကြည့်ရင်မောနေစရာမလို....
အဓိပါယ်ဖွင့်ဆို တွေးတော တွေဝေနေစရာမလို ...

ငါတို့ လုပ်ရမယ့် အလုပ်က အဲ့ဒီတံခါးကို တွန်းဖွင့်ဝင်သွားဖို့ပဲ ဖြစ်တယ်။

-------------------------

ကျောက်တုံးတစ်တုံးပေါ်ကို
အလင်းရောင် ကျနေတယ်...
အလင်းကွယ်သွားတဲ့အခါ ကျောက်တုံးပေါ်
မှောင်ရိပ်ကျလာမှာပဲပေါ့။
ကျောက်တုံးဟာ ဘာမှ မပြောင်းလဲ သွားပါဘူး။

လူတွေဟာ ကိုယ်ကောင်းမှုပြုတဲ့အခါ
တစ်လောကလုံး သိစေချင်ကြတယ် ....
ကိုယ်က မကောင်းမှုပြုတဲ့အခါကျတော့
တစ်လောကလုံး ဘယ်သူမှ မသိစေချင်ကြပြန်ဘူး။

လောကကတော့ ဘာမှ မပြောင်းလဲပါဘူး။
သင့်စိတ်ကသာ အလင်း-အမှောင်ကို ထွန်းညှိနေတာပါ။



-------------------------------------
ရေခွက်တစ်ခွက်ရဲ့ အသုံးဝင်မှု့ဟာ ဘယ်အပေါ်မှာ မူတည်သလဲ?
ရေခွက်ရဲ့ အပြင်နံရံပေါ်မှာ ချယ်သထားတဲ့ ကနုတ်ပန်းတွေ အပေါ်မှာလား၊ အနားကွပ်ထားတဲ့
ရွှေစင် ရွှေသားတွေရဲ့ တန်ဖိုးပေါ်မှာလား?
ဒါမှမဟုတ် ---
ရေခွက်ရဲ့ အတွင်းက လစ်ဟာနေတဲ့ ဗလာဟင်းလင်း ဖြစ်မှုအပေါ်မှာလား?

---------------------------------------
ပင်လယ်ဟာ တောင်တန်းတွေရဲ့ ဘုရင်ဖြစ်တယ်
ဘာဖြစ်လို့လဲဆိုတော့ ....
ပင်လယ်ဟာ အားလုံးရဲ့ အောက်နိမ့်တဲ့ နေရာမှာ ရှိနေလို့ပဲ။

ပင်လယ်ဟာ သူ့ကို တောင်တန်းတွေက
ဝါးမျိုသွားမှာကို စိုးရိမ်ပူပန်မနေဘူး။
တောင်တန်းတွေကသာ သူတို့ကို ပင်လယ်က
ဖုံးလွှမ်းသွားမှာ ကြောက်ရွံ့စိုးလန့်နေရရဲ့။

မသိမ်းပိုက်သူဟာ
အရာရာကို အောင်နိုင်တယ်။

-----------------------------------------

အသုံးမကျတဲ့ ပေါင်းမြက်ပင်တွေနဲ့
အသုံးဝင်ဆုံးလို့ ဆိုကြတဲ့ ကျွန်းပင်တွေဟာ
မြေကြီးတစ်ခုတည်းရဲ့ အပေါ်မှာပဲ
ပေါက်ကြတယ်။

တစ်စုံတစ်ရာကို ရယူပိုင်ဆိုင်ရတာပဲဖြစ်ဖြစ်
တစ်စုံတစ်ရာကို စွန့်လွှတ်ပေးဆပ်ရတာပဲ ဖြစ်ဖြစ်ပေါ့
ထားလိုက်ပါလေ..... ထားလိုက်ပါ။

နှလုံးသားဆိုတဲ့ အရာဟာ
မြေကြီးဆန်တယ်။

------------------------------------

နိဂုံးဆိုသည်မှာ သုည၏ ဟိုဘက်အလွန်တွင်သာ
ရှိသင့်သော အရာဖြစ်ပါသည်။
အရာရာကို နိဂုံးချုပ်လိုက်ပြီဆိုလျှင် အကြွင်းအဖြစ် သုညပင်လျှင်
မကျန်ရစ်ခဲ့သင့်ပါ။

အဘယ်ကြောင့်ဆိုသော် ...... သုညသည် အရာရာတိုင်း၏
မိခင်ဖြစ်၏။ သုညရှိနေလျှင် ဘ၀သည် အသစ်တစ်ဖန်
ပြန်စနေရဦးမည်။ လောကသည် သံသရာအသစ်
ပြန်လည်ရဦးမည်။

တကယ်တမ်း ...
သင့်ကိုယ်သင် နိဂုံးချုပ်လိုလျှင်
သင့်စိတ်သည် သုည၏
ဟိုဘက်အလွန်အထိ ရောက်အောင် သွားသင့်ပါသည်။

---------------------------

စောင်းတို့ကို ရိုက်ချိုးလော့....
ထိုအခါ လူတို့သည် ကိုယ်ပိုင်နားရွက်ဖြင့်
ပကတိအတိုင်း နားထောင်တတ်လိမ့်မည်။

အမြင်စူးရှသူတို့၏ မျက်လုံးကို ပိတ်လော့...
ထိုအခါ လူတို့သည် ကိုယ့်မျက်စိဖြင့် ကိုယ်
ကြည့်မြင်တတ်ကြလိမ့်မည်။

မြင့်မြတ်ခြင်းကို ဖျက်သိမ်းလော့...
ထိုအခါ မြင့်မြတ်ကြလိမ့်မည်။

------------------------------------------

ဂျပန် ပုံပြင်တစ်ပုဒ်ထဲတွင် လေပြည်တိုးဝှေ့သောကြောင့်
လှုပ်ယမ်းနေသည့် အလံငယ်ကလေးကို ကြည့်ပြီး လူနှစ်ယောက်
ငြင်းခုံကြသည်။
တစ်ယောက်က ----
အလံက အ၀တ်စကလေး လှုပ်ယမ်းနေတယ်...

အခြားတစ်ယောက်က
အ၀တ်စက လှုပ်တာ မဟုတ်ဘူး၊ လေက လှုပ်နေတာဟုပြော၏။
ထို့နောက် ---- သူတို့နှစ်ယောက်ကို အဆုံးဖြတ်ပေးရန်
တရားဓမ္မအားထုတ်နေသည့် ဆရာဖြစ်သူကို သွားမေးကြသည်။
ဆရာက ...
အ၀တ်က လှုပ်တာလဲ မဟုတ်ဘူး၊ လေက လှုပ်တာလဲ မဟုတ်ဘူး၊
စိတ်က လှုပ်နေတာဟု ဖြေလိုက်သည်။

-----------------------------------

နေထွက်သည်ဟု မည်သူ ပြောပါသနည်း၊ နေ၀င်သည်ဟု မည်သူ ပြောပါသနည်း။

နေဆိုသည်မှာ ၀င်လည်း မ၀င်၊ ထွက်လည်း မထွက်ဘဲ သူ့ဘာသာသူ တည်ငြိမ်နေသည့်
အရာတစ်ခုသာဖြစ်သည်။ တကယ်တမ်း ရွေ့လျား ပြောင်းလဲသွားသည်မှာ
ကမ္ဘာမြေကြီးနှင့် လူသားတို့သာ ဖြစ်၏။

သို့သော် မည်သူကမှ ကမ္ဘာမြေကြီး ရှေ့သို့ လည်သွားသည်ဟုလည်းကောင်း၊ ကမ္ဘ္ဘာမြေကြီး
အနောက်သို့ လည်သွားသည်ဟု လည်းကောင်း မပြောဆိုကြပါ။

လူတိုင်း နားလည်စေချင်လျှင် နေ၀င်ပြီ၊ နေထွက်ပြီ ဟူသော ဝေါဟာရ အမှားအယွင်းကိုပင်
သုံးနှုန်းပြောဆိုရမည်ဖြစ်၏။

မှားနေလျှင် ပြင်လိုက်ပေါ့ဟု
ခပ်လွယ်လွယ် အကြံမပေးစေလိုပါ။

တကယ်တမ်း မှားပြီဆိုလျှင် ပြင်ဖို့ ခက်ပါသည်။

-----------------

အထူးသဖြင့် လူတွေအများကြီး တစ်ညီတစ်ညွတ်တည်း မှားကြသော
အမှားများသည် ပြင်ဖို့ရန် အခက်ဆုံးဖြစ်၏။

---------------------------

လူတော်တော်များများသည် ကြိုးတန်းပေါ်တွင် လမ်းလျှောက်နေသူကို
အားကျတတ်ကြ၏။ သို့ရာတွင် သူတို့ကိုယ်တိုင်ကမူ မြေပြင်ပေါ်တွင်
မည်သို့ လမ်းလျှောက်ရမည်ကို မသိကြချေ။

---------------------

လူ့ဘ၀ကို အပြည့်အ၀ရရှိသော လူသားစစ်စစ်တစ်ယောက်ဖြစ်ရန်
အချက်နှစ်ချက် လိုအပ်ပါသည်။ ယင်းအချက်များမှာ-
အန္တရာယ် (Danger)နှင့်
လှုပ်ရှားကစားခြင်း (Playing) တို့ဖြစ်၏။

-----------------------------

မိမိ၏ ပတ်ဝန်းကျင် လူ့အဖွဲ့အစည်းအတွင်း ပေါင်းသင်းဆက်ဆံရာတွင် ဖြစ်စေ
ခေတ်၏ အပြောင်းအလဲနှင့်ဖြစ်စေ၊ အတွေးအခေါ် အယူအဆများ ပြုပြင်
ပြောင်းလဲနေသော အသွင်ဖြင့် ဖြစ်စေ .... လိုက်လျောညီထွေဖြစ်အောင်
မနေတတ်ပဲ မိမိတစ်ဦးတည်း ဘေးထွက်နေသူများ၊ အံဝင်ခွင်ကျ မဖြစ်သူများ၊
အထိုက်အလျောက်လိုက်ပြီး ကိုယ့်စိတ်ကိုယ် သက်သာအောင်
မနေတတ်ဘဲ ပင်ပန်းဆင်းရဲ နေသူများ၏ စိတ်သဘောကို MALADJUSTMENT ဟုခေါ်သည်။

(ဆစ်ဂမန်ဖရွိုက်)

----------------------------

မျှော်လင့်ချက်တွေကလည်း
သစ်ရွက်တွေလိုပဲ
တဖွဲဖွဲ ကြွေကျတတ်လွန်းတော့
ငါ့မှာ
လေပြည်လေညင်းတိုက်ခတ်မှာကိုတောင်
ကြောက်ရွံ့နေရတယ်။

----------------------

ခွင့်လွှတ်ခြင်းကို မမွေးမြူတတ်သူတစ်ဦး၏
နှလုံးအိမ်သည် ပူလောင်မှု အဆိပ်သစ်သီးများကိုသာ
သိမ်းပိုက်ထားရသော
ဥယျာဉ်ဖြစ်လေသည်။

------------------------------

စစ်မှန်ပြီး တန်ဖိုးရှိသော အကူအညီဆိုသည်မှာ
တမင်ဖိတ်ခေါ်ရသော သံတမန်တစ်ပါးမဟုတ်ပါ။
အချိန်တန်လျှင် သူ့အလိုလို ရိုးသားစွာ
ပွင့်လာတတ်သည့် အဖြူရောင် ပန်းတစ်ပွင့်သာ ဖြစ်ပါသည်။

---------------------------------

တစ်ဖက်သတ်ပဲ စိမ်းလန်းခွင့်ရတဲ့
ဟောဒီတောအုပ်ထဲမှာ ...
ငါဘာလို့ ဆက်ရှင်သန်မှာလဲ...
လူတွေရဲ့ မျက်ဝန်းကိုက
ညှီစော်နံတယ်။

---------------------

လေတိုက်ရင် ယိမ်းပြဖို့အတွက်
မြက်ပင်တွေပေါက်နေကြတာ မဟုတ်ဘူး

ကိုယ့်ရူးသွပ်မှုနဲ့ကိုယ် စိမ်းလန်း
ငါ့အပေါ် ....
ဘယ်သူမှ လမ်းဖြတ်မလျှောက်ရင်တော်ပြီ......

-------------------------

ငါးတွေဟာ သွေးအေးတယ်
နှုတ်ဆိတ်တယ်
တိုးတိတ်လွန်းတော့လည်း
အဲ့ဒီရင်ခုန်သံကို
မင်း .... ကြားရလိမ့်မယ် မဟုတ်ပေဘူး။

ကျွန်တော်ကြိုက်သော မင်းခိုက်စိုးစံရဲ့ စကားစုများ

မှတ်သားထိုက်သော စကားစုလေးများ

လူငယ်တို့သည် အတောင်ပါသော ငှက်ကလေးများဖြစ်ကြသည်။
 

ပျံသန်းခွင့်.........ပေးလိုက်ပါ။

သစ်သားနှင့်တူပေမဲ့ နံ့သာတုံးက ထင်းမဖြစ်ပါ။ သူ့ရဲ့ သင်းပျံ့တဲ့ မွှေးရနံ့ကြောင့်ပေါ့။

အသေအချာဆုံး ရင်းနှီးမြှုပ်နှံမှု့ကတော့ ကိုယ့်ကိုကို အားကိုးခြင်းပါပဲ။

ဆုံးဖြတ်ချက်ဆိုရင် ဖြေးဖြေးချ။ လုပ်စရာရှိရင်  မြန်မြန်လုပ်။

ရိုးရိုးကန်ရုံနဲ့ မအောင်မြင်နိုင်ဘူး ရုန်းပြီးကန်လိုက်စမ်းပါ။

တစ်ခါမှ အမှားမလုပ်ဖူးတဲ့သူဟာ ဘာမှ မလုပ်ဖူးတဲ့သူပဲ။

တံခါးဖွင့်ထားတယ် တွန်းပြီးဝင်လာရမှာက မင်းအလုပ်။

သက်သာဖို့မကြိုးစားပါနဲ့ အရည်အချင်းရှိဖို့ ကြိုးစားပါ။

ဒူးထောက်ပြီး အသက်ရှင်ရတာထက် မက်တပ်ရပ်ပြီး သေရတာကမြတ်တယ်။



ပညာဆိုတာ ရတဲ့နေရာမှာယူ လိုတဲ့နေရာမှာသုံး။

ရိုးသားခြင်းက ခိုးစားခြင်းထက် ပိုပြီးမြတ်တယ်။

ဝီရိယဆိုတာ ပင်ပန်းစွာ လုပ်ခိုင်းတာမဟုတ်ပါ။ နိုးကြားထကြွခြင်းကိုသာ ဆိုလိုတာပါ။

စွန့်ပစ်သင့်တဲ့ လူ့ဘ၀ရဲ့ အမှိုက်လေးမျိုးရှိတယ်။ အဲ့ဒါ.... လောဘ၊ ဒေါသ၊ အတ္တ၊ မာန။

ကလဲ့စားချေတယ်ဆိုတာ ကိုယ်ရှုံးနိမ့်ခဲ့ဖူးကြောင်း ၀န်ခံလိုက်တာပါပဲ။

မရိုးသားဘူးဟု ထင်ရသူထက်စာလျှင် ရိုးသားချင်ယောင်ဆောင်သူက ပိုကြောက်စရာကောင်းပါသည်။

လောကကြီးမှာ မင်းထက်တော်တဲ့လူ မရှိဘူး၊

လောကကြီးမှာ မင်းထက်ကြိုးစားနေတဲ့ လူတွေပဲရှိတယ်။

ဒုက္ခဆိုတာ ကိုယ်စိုက်ခဲ့သော သစ်ပင်ဖြစ်သည်။

မာနဆိုတာ ကိုယ့်ကိုယ်ကို ပြန်ပြီးတူးဆွခံနေရတဲ့ ပေါက်ချွန်းတစ်လက်ပါ။

ပိုက်ဆံရှိတိုင်း.... လူချမ်းသာမဟုတ်ဘူး။ စာရိတ္တမွဲရင်...လူမွဲပဲ။

အလုပ်မလုပ်သောသူများသည်
 

အလုပ်လုပ်သော သူများထက်ပိုပြီး မောပန်းလွယ်ကြ၏ ။

နိုင်ရင်ခေါင်းမော့ချင်မော့။ ဒါပေမဲ့ရှုံးရင်တော့.... ခေါင်းမငုံ့မိပါစေနဲ့ ။

ဒုက္ခတွေထဲမှာ မျှော်လင့်ခြင်းများစွာနဲ့ အသက်ရှင်နေရတာလည်း
 

ဒုက္ခတစ်ခုပါပဲနော်။

ဆင်းရဲခြင်းများ၊ ပူလောင်ခြင်းများ၊ ငိုကြွေးခြင်းများဖြင့် အထပ်ထပ်
 

ရစ်ပတ်နှောင်ဖွဲ့ခံထားရတဲ့ သတ္တ၀ါကို လူဟုခေါ်ပါသည်။

လူတစ်ယောက်ရဲ့ အနာဂတ်ကို သိချင်ရင် အဲဒီလူရဲ့ ပစ္စုပ္ပန်အလုပ်ကို ကြည့်ရတယ်တဲ့။

အောင်မြင်တယ်ဆိုတာ အခက်အခဲတွေနဲ့ ဒုက္ခတွေကို အနိုင်ရခဲ့ခြင်းဖြစ်တယ်။

တိုးတက်ချင်တဲ့သူဟာ ဝေဖန်ခြင်းကို လက်ခံရတယ်။

Thursday, July 13, 2017

အပျိုကြီး

~~~~~ အပျိုကြီး ~~~~~

အဟောင်းမရဏာ တစ်ခေတ်ပြောင်းလို့
ဒေါင်းပုဝါ တစ်နှစ်ဆောင်းသော်လဲ
သောင်းမဟာ ညာတကာမိတ်ကိုလ
ခေါင်းခါခါ မျက်နှာပေးနဲ့ တွေးစိတ်ငြိုငြင်  ၊
အလို ရှင် …… လိုချင်လျှင် အလွန်ပေါသည်ဟု
အပျိုစင်လုံမေချောရယ် က မေးငေါ့ပြောချင် ၊
အသက်ကလေး ၃၀ ကျော် ပါလို့
နောင်အရေးတွေးဆရင်ဖြင့်
ရတက်မအေး ရင်ပူဆွေးတဲ့ပြင် ၊
ဆယ်စုနှစ် သုံးခုကျော်အဖော်ရယ် ရှာမတွေ့ပေဘု
အပျိုဂုဏ် ထိုဆောင်ပုဒ် ကိုလ
ရွှေလက်ကလွှတ်ချချင် ၊ ဘဝတွင် မမြင်ချင်ဆုံး ၊
သြော် …… အပျိုကြီးရယ် မို့
အလိုမပြီးနိုင်ဘု တက်ိုယ်တည်းလမ်းလျှေက်ရင် ၊
ကြောက်စိတ်ဝင် အပူမအေး ပေဘူး
လူကလေး ရဲ့ စိတ်ထင် ။
အပူအပင်မယူချင်ကြောင်းကို လ
ဇမ္ဗူတစ်ခွင်ကြားအောင်ပ စောင်းငဲ့ပြောချင် ၊
စိတ်ထဲတွင် သိမ်ငယ်ဇောနဲ့ မျောတဲ့ဖြစ်အင် ၊
သံသရာဒီစက်ဝန်းတွင်မှ
ကံကြမ္မာတစ်ပတ်ယွန်း ရင်ဖြင့် ၊
ဖန်ဖန်လာဒီအဖြစ်ဆိုးနဲ့ မတိုးပါရစေနဲ့ ဟု
အတိုးချကာ ဟိုးး ဘဝက အပြစ်တွေကျေပါစေ လို့
မြတ်စိန္တေစေတီဦးမှာ ရည်စူးကာ
ပန်း , ရေချမ်း  နဲ့   နံ့သာတိုင် ယှဉ်ပြိုင်ထွန်းပါလို့ ၊
ဒီဘဝတွင် ရွှေခင်ပွန်း နဲ့ ထာဝစဉ်
ပေါင်းဖက်ရစေကြောင်း  ကြိတ်၍ဆုတောင်းး    ။

          လူကလေး
          12.7.2017

သူ့အလှ

ထိပ်ထားသက်လျာ ၊ ရွှေဝတ်လွှာကို
မဟာသဇင် ၊ ပန်းဘုရင်နှင့်
ပမာပုံခိုင်း ၊ တုပုံနှိုင်းသော်
အရိုင်းသဇင် ဖြစ်လိမ့်မည် ။

ထိပ်ထားသက်လျာ ၊ ရွှေဝတ်လွှာကို
ပပဝတီ ၊ လှဒေဝီနှင့်
ပမာပုံခိုင်း ၊ တုပုံနှိုင်းသော်
အရိုင်းဒေဝီ ဖြစ်ပေမည်  ။

ထိပ်ထားသက်လျာ ၊ ရွှေဝတ်လွှာကို
ရွှေဝါရောင်သမ်း ၊ ငုဝါပန်းနှင့်
ပမာပုံခိုင်း ၊ တုပုံနှိုင်းသော်
အရိုင်းငုဝါ ဖြစ်လာမည် ။

          လူကလေး
          11.7.2017

Monday, July 10, 2017

မမ သခင်

အညတရ ဇာတ်ခုံပေါ်က
နှလုံးသား ကကြိုးရုပ်လေးကို
'' မမ '' အပြုံးများနဲ့အသက်သွင်းပေးခဲ့ဖူးတယ် ။

မဟူရာဝတ်လွှာရုံ လွှမ်းခြုံထားတဲ့
ညနက်တွေကိုလဲ
'' မမ '' စကားသံတွေနဲ့ လင်းလက်စေခဲ့ဖူးတယ် ။

စိတ်ညစ်ညူးဖွယ်နေ့ရက်တစ်ချို့ကို
'' မမ '' ရဲ့ ဂရုဏာစကားတွေနဲ့
နေ့ရက်တွေလှပခဲ့ဖူးတယ် ။

အတိတ်ဆိုတာ ပစ္စုပ္ပန်ရဲ့ နောက် မှာ
အနာဂါတ်ဆိုတာက မော့်မကြည့်ရဲတဲ့
ကြမ္မာဆိုး တစ်ခု
နောင်ဘဝ ဆိုတာသာရှိခဲ့ရင်
မိုးကောင်းကင်တစ်ခုအောက်မှာ
ကြယ်ကလေးအဖြစ်နဲ့
အတူတူလင်းလက်ခွင့်ရချင်ပါရဲ့ ။    ။

          လူကလေး
          11.7.2017

မမ

မျက်လွှာတစ်စုံ
ဖွင့်လိုက်ယုံဖြင့်
မြင်တွေ့ချင်တာ
'' မ '' မျက်နှာ ။

ချစ်ခြင်းတည်ရာ
သဲစိုင်လွှာဝယ်
ဌာပနာဖုံး
'' မ '' အပြုံးတည့် ။

'' မမ '' ရင်ခွင်
နိဗ္ဗာန် ထင်လျက်
မှေးစက်ခိုဝင်
နေချင်သည်မှာ ကျွန်တော်ပါ ။

          လူကလေး
          10.7.2017

Sunday, July 9, 2017

လွမ်း

လွမ်းရိပ်ပြာနှမ်း ၊
လွမ်းတဲ့လမ်းမှာ
လွမ်းပန်းပွင့်ဝေ
လွမ်းလို့နေပြီ
လွမ်းနေခြည်အောက်
လွမ်းပင်ပေါက်သည်
လွမ်းမြစ်ခိုင်မာနေပြီတကားးးး ။

လွမ်းဖွယ့်သာမော
လွမ်းတဲ့တောမှာ
လွမ်းမောမိသူ
လွမ်းရင်ပူဘိ
လွမ်းလေမိသော်
လွမ်းဆင့်ဗျာပူ
လွမ်းလေသူကို
လွမ်းသူလက်ကမ်းနေပြီတကားးးး  ။

လွမ်းရိပ်မြိုင်နန်း
လွမ်းပုံဆန်းတော့
လွမ်းသော့သော့နှင့်
လွမ်းနေရစ်စဉ်
လွမ်းလေတိုက်ဖြူး
လွမ်းရိပ်မြူးသည်
လွမ်းချင်းအသေင်္ချပါတကားးးး  ။

                 လူကလေး 
                 8.7.2017

Friday, July 7, 2017

လောက မာယာ

ချစ်ခြင်းနဲ့စစ်ခင်းရာမှာ
ပြိုင်ဘက်ကင်းခဲ့တဲ့ငါဟာ
အခုဆို လွမ်းဆွေးခြင်းကိုလဲ
တစ်ဖက်ကမ်းခတ်ကျွမ်းကျင်ခဲ့ပါပြီ ။
အကြင်နာအတုအယောင်တွေနဲ့
လူ့ဘောင်ကို အရောင်ဆိုးတဲ့သူတွေကြားမှာ
ငါဟာ နစ်မွန်းနေခဲ့ တယ် ။
သစ္စာကို ဝေရာမဏိ လုပ်တဲ့သူတွေများလာတော့
မေတ္တာဆို အင်မတန် ရှားပါး တဲ့
ကျောက်ဖြစ်ရုပ်ကြွင်း ဖြစ်လာတယ် ။
မှိန်ပြပြစေတနာ တစ်ချို့က
သောက်နေကျကော်ဖီတစ်ခွက်လောက်တောင်
ရောင်ပြန်မဟပ် တော့ဘူး ။
ဟောင်းနွမ်းနေတဲ့ ကတိ တွေကြားမှာ
ယုံကြည်မှုတွေ ပျက်သုဉ်းလာတယ် ။
မိတ်ကပ်လိမ်းထားတဲ့
စကားလုံးတစ်ချို့ကို
နုတ်ဖျားမှာတန်ဆာဆင်လိုက်တော့
ယဉ်ကျေးတယ်လို့ဆိုကျပြန်တယ် ။
အမှန်တရားတွေက ခပ်ရိုင်းရိုင်းတွေများတယ် ၊
ငါလဲ သဘာဝနဲ့ အထာကျအောင်နေဖို့ အတွက်
ဟန်ဆောင်မှုကို လိမ်းကျံ ရတော့မယ် ။
တော်ပြီ  တော်ပြီ  အခုချက်ချင်းပဲ
ချစ်ခြင်းနဲ့လွတ်ကင်းအောင်
သောက်နေကျ အလွမ်းကော်ဖီ ခါးခါးလေးပဲ
သောက်နေတော့မယ်

          လူကလေး
          8.7.2016

ချော့သိပ်ပါလော့ အို မရဏ


သိပ်ပါလော့ အို-မရဏ

အို မရဏ၊ ငါ့အားလှုပ်ယမ်း
သိပ်စမ်းပါလော့၊ ဖျော့ဖျော့ငြိမ်ဆိတ်၊
နားမှိတ်စက်ရာ၊ ခေါ်ပါဆောင်ကြဉ်း၊
ငါ့ကိုနှင်းလော့၊ နွမ်းလျော့ပင်ပန်း
ကြေနွမ်းညိုညစ်၊ အပြစ်ကင်းစင်၊
ငါ့ဝိညာဉ်ကို၊ သတိသိုထား၊
ရင်ခွင်ကြားမှ၊ ခွဲသွားထွက်ခွာ၊
သွားစေပါတော့။ ။
မသာခေါင်းလောင်း၊
သောင်းသောင်းညံညံ၊ မြည်သံဆူဟီး၊
ဆက်တီးပါစေ၊ ကြေကွဲလွမ်းလျ၊
ဈာပနတေး၊ ငါ့တွက်ညည်းဆို၊
ငိုကြွေးထုတ်အန်၊ ခေါင်းလောင်းသံညင်း၊
ငါ့သေခြင်းကို၊ ဆိုတင်းထုတ်ဖော်၊
အော်မြည်ပါစေ၊ သေခြင်းတရား၊
ဆွဲအားပြင်းပြင်း၊ ချဉ်းကပ်လာမူ၊
အဘယ်သူသည်၊ ကယ်ယူကုစားနိုင်မည်နည်း။

ငါ့နာကျင်မှု၊ စာရတုဖြင့်၊
ဖွဲ့စုပုံတူ၊ အဘယ်သူသည်၊
ဖော်နိုင်မည်နည်း၊ ငိုညည်းမြည်ကြွေး၊
အလိုလေးတ၊ ပြင်းပြသည်းထန်၊
ငါ့ဒဏ်ရာတွေ၊ သေလုမျောပါး၊
ခွန်အားမဲ့ကင်း၊ ပျက်ယွင်းတန်ဖိုး၊
သက်ဆိုးရှည်ရန်၊ မဖန်တီးပါ။ ။
မသာခေါင်းလောင်း၊
သောင်းသောင်းညံညံ၊ မြည်သံဆူဟီး၊
ဆက်တီးပါစေ၊ ကြေကွဲလွမ်းလျ၊
ဈာပနတေး၊ ငါ့တွက်ညည်းဆို၊
ငိုကြွေးထုတ်အန်၊ ခေါင်းလောင်းသံညင်း၊
ငါ့သေခြင်းကို၊ ဆိုတင်းထုတ်ဖော်၊
အော်မြည်ပါစေ၊ သေခြင်းတရား၊
ငါ့အားပြင်းပြင်း၊ ချဉ်းကပ်လာမူ၊
အဘယ်သူသည်၊ ကယ်ယူကုစားနိုင်မည်နည်း။

နရသိန်ထဲ၊ တကိုယ်တည်းပင်၊
ဖောက်လွဲကြမ်းတမ်း၊ ငါ့လမ်းဆုံးအား၊
စောင့်စားနေ၏၊ ပီဘိကြမ်းကြုတ်၊
စက်ဆုပ်ဝမ်းနည်း၊ ကြေကွဲလွမ်းဇာတ်၊
ဤဖြစ်ရပ်တွက်၊ ရက်စက်နာကျင်၊
ဖြစ်အင်ဖန်ဖန်၊ ထိုက်တန်သလော၊
မောလျကိုယ်စိတ်၊ ထိတ်လန့်နွမ်းကြေ၊
မပြေကြမ်းတမ်း၊ ငါမြည်းစမ်းရန်၊
ထိုက်တန်သလော၊ တွေးတောဖွေရှာ။ ။
မသာခေါင်းလောင်း၊
သောင်းသောင်းညံညံ၊ မြည်သံဆူဟီး၊
ဆက်တီးပါစေ၊ ကြေကွဲလွမ်းလျ၊
ဈာပနတေး၊ ငါ့တွက်ညည်းဆို၊
ငိုကြွေးထုတ်အန်၊ ခေါင်းလောင်းသံညင်း၊
ငါ့သေခြင်းကို၊ ဆိုတင်းထုတ်ဖော်၊
အော်မြည်ပါစေ၊ သေခြင်းတရား၊
ဆွဲအားပြင်းပြင်း၊ ချဉ်းကပ်လာမူ၊
အဘယ်သူသည်၊ ကယ်ယူကုစားနိုင်မည်နည်း။

နှုတ်ဆက်ခဲ့သည်၊ အတိတ်ဆီမှ၊
ကြည်နူးမှုများ၊ ချန်ထားရင်းဆို၊
ကြိုဆိုပါသည်၊ ပွေလီပူလျ၊
ပစ္စက္ခမှ၊ ပြင်းပြသက်ငင်၊
နာကျင်မှုများ၊ ခံစားလန့်ထိတ်၊
ကိုယ်စိတ်နှစ်ဝ၊ ဒုက္ခတရား၊
တိုးပွားလာနေ၊ မရှေ(ရှည်)အသက်၊
ရေပွက်ပမာ၊ တသက်လျာထင့်။ ။
မသာခေါင်းလောင်း၊
သောင်းသောင်းညံညံ၊ မြည်သံဆူဟီး၊
ဆက်တီးပါစေ၊ ကြေကွဲလွမ်းလျ၊
ဈာပနတေး၊ ငိုကြွေးမှားယွင်း၊
ငါ့သေခြင်းတွက်၊ ဆိုတင်းထုတ်အန်၊
ခေါင်းလောင်းသံညင်း၊ သေခြင်းတရား၊
ဆွဲအားပြင်းပြင်း၊ ချဉ်းကပ်လာမူ၊
အဘယ်သူသည်၊ ကယ်ယူကုစားနိုင်မည်နည်း။

ယခုငါသည်၊ သေခြင်းဆီသို့၊
သွားမည်နောက်ဆုံး၊ ငါ့နိဂုံးကို၊
ယူကျုံးမရ၊ တသ,သနှင့်၊
ဖွဖွဆိုညည်းရစ်ပါလေ။ ။

အန်း(န်)ဘိုလင်း (Anne Boleyn – Marquess of Pembroke)
ပန်းမ်ဘရွတ်ခ် မြို့စား နှင့်အင်္ဂလန်မိဘုရားကြီး (၁၅၃၃-၁၅၃၆)

O Death! rocke me asleep

O Death! rocke me asleep;
Bringe me to quiet reste;
let pass my weary, guiltles ghost
out of my carefull brest.
Toll on, the passinge-bell;
ring out my dolefull knell;
let thy sounde my death tell.
Death dothe drawe ny;
there is no remedie.

My paynes, who can expres?
Alas! they are so stronge
my dolor will not suffer strength
my lyfe for to prolonge.
Toll on, the passinge-bell;
ring out my dolefull knell;
let thy sounde my death tell.
for I must dye;
there is no remedie.

Alone, in prison stronge,
I wayte my destenye.
Wo worth this cruel hap, that I
should taste this miserie!
Toll on, the passinge-bell;
ring out my dolefull knell;
let thy sounde my death tell.
Death dothe drawe ny;
there is no remedie.

Farewell! my pleasures past;
welcum! my present payne.
I fele my tormentes so increse
that lyfe cannot remayne.
Toll on, the passinge-bell;
rong is my dolefull knell;
for the sound my dethe doth tell.
Death dothe drawe ny;
there is no remedie.

Sound my end dolefully
for now I dye.

Anne Boleyn – Marquess of Pembroke and Queen Consort of England (1533-1536)


Anne Boleyn in the Tower by Edouard Cibot (1799–1877)